भूमिकांची अदलाबदल आपल्या आयुष्यात ताजेपणा आणते हे नक्की।मी धनूबरोबर अभ्यास करताना तिची स्टाईल एकदा स्वीकारुन पाहिली।आम्ही रात्री दहा नंतर वाचायला बसलो।अकरा नंतर कॉफी प्यालो।साडेबाराला दारं उघडून गच्चीवरच्या झुल्यावर बसलो ।आणि मधला सगळा वेळ भरपूर वाचून ,कृतकृत्य होऊन अडीच नंतर झोपलो।
मला तर मजाच आली।पण धनूकडून इतक्या नव्या गोष्टी कळल्या,अभ्यासाच्या नव्या पध्दती कळल्या।गंमत म्हणजे आमच्यात खूप सुंदर संवादाचा पूल बांधला गेला।ती मला मध्यरात्री इंडियन पीनल कोड सांगत होती नि मी तिला मलीक मुहम्मद जायसी।
नंतर आमच्या भूमिकांची नकळत अदलाबदल झाली।दुसऱ्या दिवशी ती मला सेंटर वर सोडायला आली।रुम नंबर ,बेंच शोधून मी बसेपर्यंत तिनी सोबत केली।पेपर संपवून खाली उतरता क्षणी ती मला घ्यायला आलेली दिसली।
रात्री मला खूप लवकर आणि प्रचंड झोप येत होती तर तिने झकास तेलमॉलीश करून दिलं।मी एकीकडे हातातल्या फोनमध्ये काही वाचत ,दुसरीकडे तिच्याशी बोलता बोलता झोपले।तर तिनी नीट फोन उचलून ठेवून,माझ्याअंगावर पांघरुण घालून,पंखा कमी करून,दिवे मालवले आणि दार ओदून घेऊन ती तिच्या अभ्यासाला जाऊन बसली।
सकाळी ती उठल्यावर तिला म्हणाले
"राणू वीस वर्षापूर्वी मी तुला असंच झोपवायचे बरं का !आणि पलंगाच्या काठाला दोन्हीकडून गादीखाली लोड लावून ठेवायचे।तू तेवढंच शिल्लक ठेवलंस नं ?"
ती मला हसून म्हणते कशी," कारण ' 'लोड' हा पूर्वीही आमचा विषय नव्हता आणि आताही नाही नं आई!!!"
माझा पेपर कसा गेला ते महत्वाचं नाही। पण त्या दरम्यान मी नव्या पिढ़ीचं नवीन काहीतरी शिकले आणि ' लोड 'न घेता खूप आनंदात झोपी गेले हे किती मस्तय नं ?
No comments:
Post a Comment